Samsung Galaxy A55 smartfoni uchun One UI 9’ning barqaror versiyasi tarqatila boshlandi. Hozircha yangilanish Janubiy Koreyada mavjud.
My FanCam funksiyasi qo‘shildi
One UI 9’dagi asosiy yangiliklardan biri My FanCam funksiyasi bo‘ldi.
U avval yozib olingan videoda tanlangan insonni avtomatik kuzatib, uni kadr markazida ushlab turadi. Bu foydalanuvchiga videoni qo‘lda qayta kadrga joylashtirmasdan dinamik roliklar yaratish imkonini beradi.
Now Brief yanada moslashtiriladi
Now Brief funksiyasi ham yangilandi. Endi foydalanuvchi kundalik ma’lumot kartalarini o‘zi shakllantirishi va tahrirlashi mumkin. Ular orasiga ob-havo, sog‘liq bo‘yicha ma’lumotlar yoki videolarni qo‘shish mumkin.
Now Nudge aqlliroq ishlaydi
Now Nudge funksiyasi ko‘proq joyda paydo bo‘ladigan bo‘ldi. U klaviatura, bildirishnomalar va suzuvchi tugma orqali kontekstga mos harakatlarni taklif qiladi. Masalan, yozishmadan manzilni saqlash yoki uchrashuvni kalendarga qo‘shish mumkin.
Quick Panel sozlamalari kengaytirildi
One UI 9’da Quick Panel interfeysi ham moslashuvchanroq bo‘ldi.
Foydalanuvchi endi yorqinlik, ovoz balandligi va media pleer slayderlarining o‘lchamini o‘zgartira oladi.
Samsung Notes va Health ham yangilandi
Samsung Notes ilovasiga yangi Tape vositasi qo‘shildi.
Bundan tashqari, Samsung Health interfeysi yaxshilandi, maxfiylik himoyasi uchun sun’iy intellektga asoslangan ogohlantirishlar paydo bo‘ldi.
DeX va Interpreter funksiyalari ham takomillashtirildi. Interpreter ilovasiga Thread View rejimi qo‘shilgan.
Boshqa hududlarga ham tez orada yetib boradi
Janubiy Koreyada yangilanish A556SKSUBEZJ1, A556SSKCBEZJ1 va A556SKSUBEZI8 yig‘ilmalarida tarqatilmoqda.
Agar tarqatish jadvali o‘zgarmasa, One UI 9 Galaxy A55 foydalanuvchilari uchun boshqa hududlarda ham yaqin kunlarda mavjud bo‘lishi kutilmoqda.
Avvalroq Kursiv Uzbekistan Galaxy S27 Ultra juda ingichka ramkali ekran olishi mumkinligi haqida yozgan edi.
