Chevrolet kompaniyasi Braziliyada 2026-yilgi Chevy Spark EUV Activ modelini rasman e’lon qildi. Bu haqda Gm Authority nashri ma’lum qildi.
Avtomobil butun Lotin Amerikasi bo‘ylab sotiladigan yagona to‘liq elektr Sparkdir. GM Janubiy Amerika mahsulot marketingi direktori Paula Saiani ta’kidlashicha, yangi Spark faqat bitta – Activ trimida sotiladi.
«Bu model o‘zining sarguzasht ruhini va jozibasini kuchaytiradi. Shu bilan birga, Braziliya iste’molchilarining afzalliklariga moslashtirilgan maxsus kombinatsiyani taklif etadi», – dedi Saiani.
Spark EUV Activ Braziliya avtomobil bozoridagi tobora bir-biriga o‘xshash kichik SUV segmentida o‘ziga xoslik yaratish uchun ishlab chiqilgan. Model baland tom chizig‘i va ixcham, biroq jasur dizayni bilan ajralib turadi.
«Spark Braziliyada bir asrdan beri Chevrolet ishonchi va barqarorligini ifodalab kelgan», – deya qo‘shimcha qildi Saiani.
2026 Chevy Spark EUV Activ boshidan elektr transport vositasi sifatida ishlab chiqilgan bo‘lib, qulay interyeri, moslashuvchan dizayni va tezkor boshqaruvi bilan ajralib turadi. U Braziliya iste’molchilariga quvnoq va rang-barang ranglar palitrasi bilan taqdim etiladi.
Yangi Spark EUV Activ yaqin oylarda Braziliyada sotuvga chiqariladi. Shuningdek, Chevrolet uni «Spark» nomi bilan taqdim etadi va Braziliyada qo‘shimcha «EUV» belgisi ishlatilmaydi. Chunki bu bozor uchun Spark nomi yetarli va alohida tanishuv talab qilmaydi.
Avvalroq Kursiv Uzbekistan Chevrolet Spark’ning ilk ko‘rinishi qanday bo‘lgani haqida yozgan edi.
