Chevrolet Equinox 2027 elektromobili uchun kuzov ranglari qatorini yangiladi. Bu haqda GMAutority nashri xabar bermoqda.
Yangi model yilida Galaxy Gray Metallic rangidan voz kechiladi, uning o‘rniga White Sands nomli yangi rang taklif etiladi.
Yangilanish avtomobilning uchala komplektatsiyasi — LT 1, LT 2 va RS versiyalariga taalluqli bo‘ladi. White Sands rangi xaridorlarga qo‘shimcha to‘lovsiz taqdim etiladi.
Galaxy Gray Metallic rangidan voz kechildi
Galaxy Gray Metallic Equinox EV uchun uzoq vaqt davomida taklif etib kelingan ranglardan biri hisoblanadi. U elektr krossover 2024-yilgi model sifatida bozorga chiqqanidan beri ranglar qatoridan joy olib kelgan.
2026-yil boshidayoq ushbu rangdagi avtomobillarni ishlab chiqarish muddatidan oldin yakunlash jarayoni boshlangan va yangi buyurtmalarni qabul qilish to‘xtatilgan edi. O‘sha paytda Galaxy Gray Metallic 2027-yilgi modelga qaytishi yoki qaytmasligi aniq emas edi. Endi esa rang yangi model yilida umuman taklif etilmasligi tasdiqlandi.
2026-yilgi Equinox EV’da Galaxy Gray Metallic LT 1 va LT 2 komplektatsiyalari uchun qo‘shimcha to‘lov talab qilmaydigan ranglardan biri bo‘lgan. LT 2 xaridorlari uni Summit White yoki qora kontrast tom bilan uyg‘unlashtirish imkoniga ham ega edi. Bunday tom uchun $495 qo‘shimcha haq olinardi.
White Sands barcha versiyalarda mavjud bo‘ladi
Yangi White Sands rangi 2027-yilgi Chevrolet Equinox EV’ning LT 1, LT 2 va RS komplektatsiyalarida taklif etiladi.
Muhimi, yangi rang uchun alohida to‘lov belgilanmagan. Shu tariqa Chevrolet xaridorlarga yangi tashqi ko‘rinish variantini bazaviy ranglar qatorida taqdim etadi.
Modelning qolgan tashqi ko‘rinishi va asosiy konstruktsiyasi 2026-yilgi versiyaga nisbatan katta o‘zgarishlarga uchramaydi.
Equinox EV NACS zaryadlash portiga ega bo‘ladi
2027-yilgi Equinox EV’dagi eng muhim texnik yangiliklardan biri NACS standartidagi zaryadlash portining to‘g‘ridan-to‘g‘ri avtomobilga o‘rnatilishi bo‘ladi.
Bu elektromobilga turli zaryadlash stansiyalaridan, jumladan Tesla Supercharger tarmog‘idan adapter ishlatmasdan foydalanish imkonini beradi.
NACS portining qo‘shilishi Equinox EV egalari uchun zaryadlash infratuzilmasidan foydalanishni soddalashtirishi va mavjud stansiyalar sonini amalda kengaytirishi mumkin.
Avvalroq «Kursiv» Chevrolet Cobalt avtomobilining narxi keskin pasaygani haqida yozgan edi.
