SpaceX Starship dasturi doirasida ilk bor parvoz qilgan kosmik kemani yana start bazasiga qaytardi. Ship 40 apparati Texasdagi Starbase bazasiga olib kelinib, Megabay yig‘uv majmuasida vertikal holatda o‘rnatildi.
Kompaniya apparatning real parvozdan keyingi holatini batafsil o‘rganishni rejalashtirmoqda. SpaceX Ship 40’ning rasmiy surat va videolarini ham e’lon qildi.
Ship 40 Megabay majmuasiga joylashtirildi
Ship 40 parvoz vaqtida atmosfera, kosmik fazo va okean orqali o‘tganidan so‘ng Starbase bazasiga qaytarildi.
Hozirda kema Megabay majmuasida vertikal holatda turibdi. U yerda yana uchta Starship apparati ham mavjud.
Bu Starship dasturida parvoz qilgan kosmik kemaning keyinchalik start bazasiga qaytarilib, muhandislik tahliliga topshirilishi bo‘yicha ilk holat bo‘ldi.
Issiqlik himoyasi va Raptor dvigatellari tekshiriladi
SpaceX muhandislari, avvalo, kemaning issiqlikdan himoya qiluvchi qoplamasi, Raptor dvigatellari, avionika va boshqa muhim tizimlarini tekshiradi.
Tahlil orqali apparatning uchirish paytidagi yuklamalar, kosmosdagi parvoz va atmosferaga qaytish jarayoniga qanday bardosh bergani o‘rganiladi.
Kompaniya bu ma’lumotlar Starship’ning keyingi versiyalarini takomillashtirish va navbatdagi parvozlarni tayyorlashda yordam berishini kutmoqda.
Tahlil qancha davom etishi noma’lum
SpaceX Ship 40’ni tekshirish ishlari qachon yakunlanishi va hozirgacha aynan qanday sinovlar o‘tkazilgani haqida batafsil ma’lumot bermadi.
Biroq apparatni parvozdan keyin to‘liq o‘rganish Starship konstruksiyasining qayta foydalanish imkoniyatlarini baholash va keyingi parvozlarda tizimlar ishonchliligini oshirish uchun muhim ma’lumot berishi mumkin.
Avvalroq «Kursiv» Ilon Mask AQSh saylovlariga $276 mln sarflagani haqida yozgan edi.
