Dori vositalarini davlat ro‘yxatidan o‘tkazish jarayonida taqdim qilinadigan hujjatlarga nisbatan yangi tartib va texnik talablar joriy etildi. Bu haqda Adliya vazirligi ma’lum qildi.
«Dori vositalarini davlat ro‘yxatidan o‘tkazish hujjatlariga qo‘yiladigan talablar to‘g‘risida»gi yo‘riqnoma davlat ro‘yxatidan o‘tkazildi. Ushbu hujjatga ko‘ra, Vazirlar Mahkamasining 2025-yil 24-noyabrdagi 738-son qarori bilan tasdiqlangan nizomda belgilangan ro‘yxatdan o‘tkazish hujjatlari inson uchun qo‘llaniladigan dori vositalariga qo‘yiladigan texnik talablarni uyg‘unlashtirish bo‘yicha xalqaro kengash (ICH) talablari asosida taqdim etilishi lozim.
Shuningdek, dori vositasi ishlab chiqarishda hayvon xomashyosidan olingan moddalar qo‘llanilgan bo‘lsa, ularning tarkibida prionlar mavjudligi yoki mavjud emasligi hujjatlarda aniq ko‘rsatilishi shart etib belgilandi. Bu talab dori xavfsizligi va sifat nazoratini kuchaytirishga qaratilgan.
Bundan tashqari, dori vositasining genetik modifikatsiyalangan organizmlar (GMO) saqlashi yoki ulardan olinganligi to‘g‘risidagi ma’lumotlar ham majburiy ravishda kiritiladi. Bunda GMO turi va manbasi, genetik konstruksiya va ekspressiya tizimi, biologik hamda ekologik xavfsizlik choralari, ishlab chiqarish jarayonidagi bosqichlar va tegishli xavfsizlik hujjatlari haqida batafsil ma’lumot berilishi kerak.
Shuningdek, dori vositasini tibbiyotda qo‘llash bo‘yicha yo‘riqnomaga xalqaro talablarga mos va reklama xususiyatiga ega bo‘lmagan qo‘shimcha ma’lumotlarni kiritishga ruxsat etiladi.
Eslatib o‘tamiz, avvalroq O‘zbekiston va Pokiston onkologiya va yurak-qon tomir kasalliklari uchun dori ishlab chiqarishni yo‘lga qo‘yishi haqida yozgan edik.
